فرد الشعر بالمكواه بدون ضرر للشعر

ازاى نفرد شعرنا بالسشوار و المكواة من غير ما نضر الشعر

عايزة اقولكم
ان ف الغرب
البنت ممكن تكوى شعرها كل يوم تقريبا و ده يبقى روتين يومى عندها
و هاتلاقوا فيديوهات ع اليوتيوب بتؤكد كلامى
و مع ذلك شعرهم مش بيبوظ
لييييييه؟؟
ده اللى هانعرفه مع بعض ان شاء الله 



الجزء الاول من الموضوع
هاقولكم على الادوات اللى هنحتاجها
و المنتجات اللى انا باستخدمها بالاسعار

الجزء التانى
هاقولكم اسهل طريقة لفرد الشعر

الجزء التالت
نصايح و اخطاء مفيدة ليكم

يلا نبدأ
بسم الله


1- الادوات
-----------

1- شامبو

أهميته :
نظافة الشعر و فروة الراس و ازالة اى اتربة او اوساخ عالقة بها و اى زيوت او كريمات
و دول اللى بيكونوا السبب ف ريحة الشياط اللى بنشمها و بتخلى الشعر ريحته وحشة بعد المكواة

ده غير انك لما تغسليه هاتتمكنى انك تقعدى بشعرك فترة اطول لحد معاد الشاور اللى بعده

و يفضل يكون خالى من مادة الكبريتات Sulfate لانها بتكسر الشعر
و دى للاسف موجودة ف اغلب الشامبوهات اللى ف السوق ف صورة SLS=Sodium lauryl Sulfate
بس فى بعض الشامبوهات مش بتبقى موجودة فيها و دى اللى بيستخدموها اللى بيفردوا شعرهم بالكيراتين
لان الكبريتات بتبوظ الكيراتين اللى هو البروتين الاساسى المكون للشعرة

انا باستخدم شامبو Keratin silk protien



هو كورى
620 مللى
بـ 145ج من العزبى
ممكن تقولوا غالى شوية بس بقاله معايا يجى سنتين لانه كبير
يعنى لو حسبتو تمن الشامبوهات العادية اللى بنجيبها خلال سنتين مش هاتفرق كتير

و فى شامبو تانى اسمه Global


ده 300 مللى
بـ 145ج من العزبى
و طبعا ده براند معروف اكتر من الاولانى

و اخيرا شامبو revivogen

و ده بيمنع تساقط الشعر كمان ب 92ج من العزبى

---------------------------------------------------------

2- بلسم

أهميته :
بيغلف الشعرة بطبقة حماية اللى شالها الشامبو مع بقية الحاجات اللى بيشيلها
و بالتالى بيحميها من الحاجات اللى بتتعرضلها من رطوبة و اتربة و هكذا
و كمان بيقلل هيشان الشعر

و يفضل تستخدمى البلسم نفس ماركة الشامبو عشان يبقى نظام متكامل لشعرك
و بلاش الشامبو اللى ببلسم ف نفس الازازة ده
الافضل كل واحد لوحده

و ده البلسم اللى عندى بردو Keratin silk protien

500مللى
بـ 145ج من العزبى
و بيقعد فترة اطول من الشامبو لانك بتستخدمى منه كمية اقل

و نفس الماركات الباقية فى منها البلسم بتاعها
جلوبال بـ145ج
و ريفيفوجين مش عارفة بصراحة

---------------------------------------------

3- واقى للشعر من الحرارة

و يمكن ده اكتر حاجة بننساها مع انه اهم حاجة

أهميته:
ده بيعمل طبقة سليكون حوالين الشعرة يحميها من الحرارة سواء السيشوار و المكواة
ده غير ان الطبقة دى بتسيح بالحرارة و بتدى مظهر لامع للشعرة حلو اوى و تخليها طرية
و ده اللى بيفرق لما بتكوى شعرك ف كوافير محترم و يرش لك منه قبل المكواة
و ف كوافير تانى مش بيهمه الشعر يبوظ و تلاقى شعرك مكملش يومين و بقى ناشف و هايش

اشهر ماركة هى TRESemmy
و ده الى عندى

300 مللى
بـ 65 ج من العزبى
و هتلاقى مكتوب عليه واقى من الحرارة حتى 230درجة
يعنى اعلى من حرارة المكواة كمان


طبعا خلى بالك و انتى بتجيبى المنتجات دى كلها تشوفى تاريخ الصلاحية
تكون صالحة ع الاقل لسنتين قدام
لانها بتفضل معاكى كتير جدا و ممكن ماتلحقيش تخلصيها

----------------------------------------------------

4- سيروم

أهميته :
ده بتستخدمى نقطة منه بعد ما تخلصى خالص على الشعر كله بيخبى التقصف و يمنع الهيشان و يدى لمعة للشعر
و ف اى وقت بعد كده بتستخدميه بردو عادى

انا عندى منه Cetri shine
ده شكله


على ما افتكر كان ب70ج من العزبى
و بقاله معايا سنتين و لسة ماخلصش زى مانتو شايفين
لان كمية قليلة اوى منه بتكفى الشعر كله

و فى بردو سيروم zero frizz مشهور
و ده شكله

بــ55ج من العزبى

----------------------------------------------------


5- مشط واسع لفك تشابك الشعر

لازم واسع
لان الشعر و هو مبلول بيبقى ضعيف
لو استخدمتى ضيق لفك التشابك هايتقطع منك


--------------------------------------------

6- مشط ضيق

لتوزيع السبراى ع الشعر و الناحية الرفيعة دى بتساعدك ف تقسيم الشعر

-------------------------------------------

7- مجموعة كليبسات او توك
عشان تمسك الشعر و احنا بنفرد مايتلخبطش ع بعضه

انا بافضل التوك اللى بتقفش اللى هى دى

لانها سهلة ف التعامل عن الكلبسات المعدن اللى زى عند الكوافيرة بحسها بتقطع الشعر و مش بتمسك كويس


--------------------------------------------------

8- السيشوار و الفرشاة بتاعته

أهميته :
تجفيف الشعر لو لسة غاسلاه لان غلط استخدام المكواة على شعر مبلول
ساعتها هايبقى كأنك بتغلى شعرك مش بتكويه
فرد الشعر و ده بيسهل جدا من خطوة الكوى و يقلل فترة تعرض الشعرة لحرارة المكواة العالية
و بيستخدم على البارد بعد ما تخلصى كوى الشعر بيدى مظهر طبيعى للشعر و يمنع هيشانه


يفضل تختارى السيشوار القوى يعنى الوات بتاعه يكون عالى
عشان يديكى نتايج افضل و اسرع
انا ماعرفش اوى ايه الماركات الموجودة
بس ماركة Gek الايطالى حلوة جدا معايا
هو 2000 وات




و القطعة السودا دى مهمة
دى لما بتركبيها بتسمحلك انك تقربى السشوار من شعرك جدا عادى
لان كده كده هى عاملة مسافة بين فتحة خروج الهوا و شعرك
و كمان مهمة عشان تركز الهوا اللى خارج على خصلة الشعر اللى انتى ماسكاها

--------------------------------------------------

و أخيرا
9- المكواة

و يفضل تجيبى مكواة حديثة بتقنية السيراميك او الايونات
لانها بتوزع الحرارة بشكل افضل و بتبقى احن على الشعر من القديم

و يكون فيها اوبشنز درجات الحرارة المختلفة عشان تختارى الحرارة المناسبة لشعرك
و هاقولكم ان شاء الله كل نوع شعر ايه الحرارة المناسبة ليه


انا اخترت بيبى ليس 2*1
لانى باقدر استخدمها فرد و كيرلى ف نفس الوقت ف بتغنى عن انى اجيب فير مخصوص للكيرلى


سعر السشوار و البيبى ليس و مكانهم مش هاقدر افيدكم فيه الصراحة
عشان انا اخترتهم و زوجى جابهم هدية

.